Ватикан соопшти дека погребот на папата Франциск ќе се одржи в сабота, 26 април во 10:00 часот по локално време.
Кардиналот Џовани Батиста Ре, декан на Колеџот на кардинали, ќе ја предводи мисата која ќе ја сослужат патријарси, кардинали, архиепископи, бискупи и свештеници од целиот свет.
Телото на покојниот папа Франциск потоа ќе биде однесено во базиликата Свети Петар, а потоа во базиликата Санта Марија Маџоре каде ќе биде погребан.
Пред погребот, ковчегот со телото на папата ќе биде пренесен од капелата на Домот Санта Марта до базиликата Свети Петар.
Кардиналот Кевин Фарел, камерленго на Светата римска црква, ќе претседава со обредот на преведување в среда, 23 април, кој ќе почне во 9:00 часот со момент на молитва. Поворката ќе помине низ плоштадот Санта Марта и плоштадот на римските првомаченици, соопшти Канцеларијата за печат на Ватикан.
Поворката потоа ќе излезе преку сводот на камбаните на плоштадот Свети Петар и ќе влезе во ватиканската базилика преку централната врата.
На олтарот на исповедта, кардиналот камерленго ќе претседава со Литургијата на Словото, по што ќе почнат посетите за оддавање почит на починатиот понтиф.
Папата Франциск во својот последен тестамент потврдил дека сака да биде погребан во базиликата Санта Марија Маџоре во Рим, а не во базиликата Свети Петар во Ватикан, каде што е последното почивалиште на многу негови претходници.
Во тестаментот што синоќа го објави Ватикан, Франциск јасно ја изрази желбата да биде погребан „во земја, без посебни украси“, а над неговиот гроб треба да стои едноставна плоча со неговото папско име на латински јазик: Franciscus.
Папата исто така навел дека договорил неименуван добротвор да ги покрие трошоците за неговиот погреб.
„Трошоците за подготовка на погребот ќе бидат покриени од износот што го обезбеди добротвор, а за кој договорив да биде префрлен во базиликата Санта Марија Маџоре“, стои во тестаментот.