Не знам дали веќе има уредник со професионален новинарски дигнитет. Потчинетоста на уредниците натаму се пренесува во редакциите и се пресликува во новинарските продукти па, наместо новинарство, имаме пропагандни информативни програми.
Дестан Јонузи
„Во новинарството најважен е личниот новинарски и авторски дигнитет. Без таа карактерна црта не може да се очекува професионално новинарство“, вели Зоран Иванов- долгогодишен новинар и политички аналитичар, сега главен уредник на НоваТВ, во изјава за Фронтлајн, по повод 3-ти мај Светскиот ден на слободата на медиумите.
ФРОНТЛАЈН: Како би ја опишале состојбата на медиумите во нашата земја?
Зоран Иванов: Социјална, аматерска, навивачка, полтронска, исполитизирана, изманипулирана. Голем дел од вината за неколкуте горни атрибути е во самите медиуми. Во уредничките состави, пред сè.
Во главните уредници најмногу. Тие го диктираат медиумскиот амбиент. Ниту сопствениците, ниту политиката туку главните и одговорни уредници кои без поговор ги аминуваат и ги претвораат во медиумски продукти сигналите што ги емитираат медиумските газди.
ФРОНТЛАЈН: Како го оценувате нивото на медиумските слободи и слободата на изразување?
Зоран Иванов: Во последнава декада, две посебно, не можам да се сетам дека некој уредник ја напуштил редакцијата поради несогласување со сопственикот, а бранејќи ги професионалните новинарски стандарди.
Не можам да се сетам на име на Главен уредник на национаниве ТВ, на пример, кој ја напуштил функцијата поради тоа што одбил да се адаптира на политичките или на бизнис интересите на своите претпоставени.
Не знам дали веќе има уредник со професионален новинарски дигнитет. Потчинетоста на уредниците натаму се пренесува во редакциите и се пресликува во новинарските продукти па, наместо новинарство, имаме пропагандни информативни програми.
И во сето, најжалното е не само што се прифаќаат диктати на сметка на стандарди, туку жалното е што уредниците и соработниците самите им се поттураат на сопствениците за да им ги реализираат нивните агенди од интерес.
ФРОНТЛАЈН: Кои се Вашите препораки за унапредување на медиумите и зајакнување на медиумските слободи?
Зоран Иванов: Во новинарството најважен е личниот новинарски и авторски дигнитет. Без таа карактерна црта не може да се очекува професионално новинарство.
Текстот е сопственост на Фронтлајн