НОВА пред две години објави две истражувања во коишто професорката од факултетот за безбедност и дел од раководството на СДСМ јавно говореше за причините кои и донесоа суспензија од позицијата продекан. Сторијата се актуелизира со последната т.н. опозициска бомба во којашто опозицијата денеска објави разговори помеѓу министерката за внатрешни работи Гордана Јанкуловска и генералниот секретар во владата Кирил Божиновски кои зборуваат за незадоволството поради изборот на професорката за продекан затоа што таа била критична кон нив, особено кон работата на министерката.
Првата сторија (видео горе) е објавена на 31 јули во 2013 година и ги истражува исчезнатите лаборатории коишто ги набавил Факултетот за безбедност, а чии што перформанси овозможуваат софистицирано следење на електронските комуникации. Втората сторија говори за тешкотиите со кои се соочуваат дојавувачите на корупција во Македонија, а личните приказни ги споделуваат професорката Ременски и Симо Груевски, поранешен вработен во „Телеком“ кој своевремено ја обелодени корупциската афера за оваа компанија за поткуп на политичари и остана без работа, но и заглави во тешки судски процеси, иако аферата ја потврди дури и Судот во Њујорк, САД.