Членовите на српската алтернативна музичка група С.А.Р.С. денеска споделија фотографија на социјалните мрежи со која ги поздравија средношколците во Македонија, кои веќе трета недела ја бојкотираат формалната настава во училиштата.
„Ратујемо ти и ја… како пленум и влада“, е нивната порака, чиј прв дел е наслов од нивната популарна песна.
Поддршка на средношколците им дадоа и познати музички имиња од македонската сцена меѓу кои Тони Зен, Бени Шаќири, Џака Накот, Тајзи и други.
Средношколците денеска во 12 часот во Скопје ќе го одржат третиот протестен марш како револт од игнорантскиот однос на ресорниот министер Абдулаќим Адеми.
Збирното место е фонтаната во Градски парк, а маршрутата продолжува кон Владата, и ќе заврши пред Министерството за образование и наука.
Средношколскиот пленум веќе јавно ја доби поддршката од Студентскиот, Професорскиот пленум и граѓанскиот сектор, а воедно поддршка Средношколскиот пленум доби и од Унијата на средношколци Албанци.