Украинскиот претседател Володимир Зеленски денеска изјави дека вицепремиерката Олга Стефанишина, одговорна за евроатлантската интеграција, ќе биде новата амбасадорка на Украина во САД.
Зеленски напиша на Телеграм дека ја назначил Стефанишина за специјален претседателски претставник во САД за развој на односите со Вашингтон додека таа ги поминува процедурите потребни за да ја преземе функцијата амбасадор.
Украина се обидува да ги поправи нарушените односи со САД откако Зеленски и неговиот американски колега Доналд Трамп влегоа во јавен вербален судир во Белата куќа во февруари.
Стефанишина ја извршува функцијата министерка за европски и евроатлантска интеграција од 2020 година, во кое време Украина го започна процесот на пристапување кон Европската Унија.
Сегашната украинска амбасадорка во САД, Оксана Маркарова, го предизвика гневот на кампањата на Трамп за време на неговата кампања во 2024 година против демократскиот претседател Џо Бајден.
Републиканците ја обвинија Маркарова дека ѝ помага на Демократската партија на Бајден со тоа што ја организирала посетата на Зеленски на фабрика за муниција во Пенсилванија на есен 2024 година, за време на која украинскиот претседател се сретнал со претставници на демократите, но не и на републиканците.
Инцидентот го спомена американскиот потпретседател Џеј Ди Венс за време на неговиот вербален судир со Зеленски на несреќниот состанок во Белата куќа, на кој присуствуваше и Маркарова.