Со положување цвеќе пред споменикот подигнат во чест на загинати бранители во село Љубанци, Општина Бутел, денеска беа одбележани 24 години од загинувањето на македонските бранители, припадници на резервниот состав на Армијата кои загинаа на 10 август 2001 година кај месноста Љуботенски бачила.
Венци со цвеќе пред споменикот на паднатите бранители во село Љубанци положија делегација на Влада предводена од министерот за правда Игор Филков и министерот за дигитализација Стефан Андоновски; делегација од Министерството за одбрана и Генералштабот на Армијата предводена од директорот на Генералштабот, бригаден генерал Орце Јордев; делегација на Претседателот на Република Македонија и делегација од Општина Бутел предводена од градоначалникот Дарко Костовски, како и членови на семејствата на загинатите бранители.
Градоначалникот на Општина Бутел, Костовски, порача дека денес им оддаваме почит на македонските бранители кои го положија својот живот за одбрана на Македонија.
-Пред 24 година ги изгубивме Томе Бадаревски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димоски и Раде Јанковски кои го дадоа својот живот за својата држава и тоа никогаш нема да го заборавиме. Оддаваме почит на нивното херојско дело како дел од македонска историја и да испратиме порака дека вечно ќе живеат во нашите срца, објави на Фејсбук, Костовски.
На 10 август 2001 година со воено товарно возило на патот кон месноста Љуботенски Бачила при активирање на мина животот го загубија осум припадници на резервниот состав на Армијата: Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски. На овој ден се оддава почит и на Ацо Ангеловски кој во 2000 година загина во Арачиново при вооружен напад врз полициска патрола.