Се поставува прашањето – што прават двајца министри во клучни ресори во владата, работат или ја градат својата академска кариера врз основа на функциите и ресорите што ги држат?
Дехран Муратов
По неодамнешното откритие за скандалозната злоупотреба на функцијата министер за правда за напредување во академската кариера на Игор Филков, следи уште едно, овојпат на министерот за внатрешни, Панче Тошковски.
Тема на трудот на е: „Криминолошки и компаративни аспекти за унапредување на безбедноста во јавниот сообраќај (Criminological and Comparative Law Aspects for Improvement of the Security in Public Transport)“ од кандидатот Панче Тошковски, студент на втор циклус студии – казнено право. За менторка се предлага проф. д-р Гордана Лажетиќ.
Овој случај води кон прашањата поврзани со границите меѓу академската работа и политичките функции. Темата на трудот на Тошковски се совпаѓа со ресорот што го води како министер. Тоа ја доведува академската независност под сериозен и оправдан сомнеж дека се работи за судир на интереси.
Всушност, првиот полицаец оди по стапките на првиот човек на правдата во земјата, односно заедно чекорат по истиот пат, за што неодамна пишуваше 360 степени.
На истата седница на Научно-наставниот совет на Правниот факултет „Јустинијан Први“ во Скопје, се решава и за академскиот труд на министерот за правда Игор Филков кој треба да ја одбрани својата магистерска работа на темата „Креирање стратегии во сферата на правосудството како надлежност на Министерството за правда“. Таа тема е директно поврзана со неговата работа како висок функционер – министер во Владата на Мицкоски.
Се поставува прашањето – што прават двајца министри во клучни ресори во владата, работат или ја градат својата академска кариера врз основа на функциите и ресорите што ги држат?
Ова го забележа и профилот Робусна акција на социјалната мрежа Х.
„Панче откако го стави под контрола подземјето и го реши Кочани, нашол слободно време да ја прочита тезата. Гемиџијата брзал да магистрира пред локални, затоа што после тоа ќе може само да лови риби со колегата Филков“, се вели во ироничната објавава на Х.
На крајот, со оглед на тоа дека е тешко да се одвои академската работа од политичката, односно извршната улога на двајцата министри – се поставуваат прашањата околу пристрасноста, начинот на создавање на академските трудови, судирот на интереси и злоупотребата на функцијата.
Текстот е сопственост на ЦивилМедиа