„Народот не е ваш непријател, непријатели ви се оние кои ви даваат наредби“, со овие зборови демонстрантите денеска во 18 часот го започнаа протестот со кој бараат одговорност за смртта на 22 годишниот Мартин Нешкоски, обраќајќи им се на полицајците кои во кордон повторно не дозволија да се протестира пред зградата на Владата.
Претходно, со едноминутно молчење граѓаните дадоа почит на загинатите полицајци во Куманово, информација за која се уште не е официјално потврдена од МВР и оставија цвеќиња пред кордонот полиција.
Потоа граѓаните по булеварот „Климент Охридски“, тргнаа кон седиштето на ЕУ во Скопје. Поголемо беше присуството на полиција и специјалци, отколку на демонстранти.
И пред зградата на ЕУ ги пречека полициски кордон. Демонстрантите побараа европските дипломати да покажат поголем ангажман за политичката ситуација во земјата и посочија дека нивното барање за оставки од највисоки државни функционери останува.
– Ние не смееме нашето барање за оставки од највисоки државни политичари да го ставиме под килим. Да ги повикаме европските дипломати да помогнат во справувањето со оваа фашистичка власт и нејзините фашистички методи, рече пред присутните активистот Никола Наумовски.
Наумовски побара и итно ослободување на деветмината студенти од кои на осум вчера им е доделена мерка притвор, а еден е во куќен притвор. Уапсените 9 студенти се товарат за кривичното дело учество во толпа и спречување на полициски службеник во работата. Тие вчера биле веднаш изнесени пред истражен судија и издадена им е мерка притвор.
– Уште полошо е што тие таму практично се заложници, условена е нивната слобода со нашиот прекин на протестите. Нивниот притвор е даден заради тоа што можат да го потврдат делото и може да се вратат на улица и да протестираат. Но, истражниот судија кој ја дал мерката притвор нема никаква основа, нема снимки како тие тепаат полицајци, посочи Наумовски.
Со оглед на денешната ситуација во Куманово, за која МВР соопшти дека утринава се случил терористички напад на група луѓе кои илегално влегле во земјава, демонстрантите по краток протест пред зградата на ЕУ се разотидоа. Протестот помина без никаков инцидент, а граѓаните посочија дека ќе продолжат секој ден во 18 часот да протестираат.
Ова е петти ден како се протестира, а четврти ден откако полицијата не дозволува да протест пред зградата на Владата.
Демонстрантите бараат оставки од министерката за внатрешни работи Гордана Јанкулоска, но и од премиерот Никола Груевски како одговорност за прикривање на смртта на младиот Мартин Нешкоски кој беше претепан до смрт за време на прославата на ВМРО-ДПМНЕ во 2011 од страна на полициски службеник.