Претседателските избори во Венецуела за да го заменат починатиот венецуелски лидер Хуго Чавез, ќе се одржат на 14 април, јавува Би-Би-Си, повикувајќи се на изјавата на изборната комисија на земјата.
Ова објавување доаѓа по назначувањето на фаворизираниот наследник на Чавез, Николас Мадуро, како в.д. претседател. Мадуро е кандидат на владејачката партија, додека Енрик Каприлес се очекува да се кандидира за опозицијата.
Чавез, кој ја водеше Венецуела 14 години, победи на изборите во октомври минатата година против Каприлес со 54% од гласовите, додека 44% доби опозиционерот.
Всушност, откако здравјето на Чавез се влоши, тој најави дека неговиот заменик-претседател, Мадуро, треба да го замени.
Мадуро ја најавува левичарската политика на Чавез како своја програма, и токму во прилог му се и анкетите за јавното мислење, кои го истакнуваат како фаворит за победа на следните избори.