Претседателот на Сојузот на синдикатите на Македонија, Слободан Трендафилов, на денешната прес-конференција соопшти дека синдикатот донел одлука од идниот вторник работниците да ги почнат најавените блокади.
ССМ почнува со блокада на пратениците на 10. Февруари.
Советот на ССМ и Пртетседателството на Советот одлучи на 10-ти февруари да го блокираме Собранието, да ги блокираме пратениците кои нема да можат да наплатат патни трошоци, а ќе треба да поминат покрај работниците и да им кажат зошто тие ќе имаат право на зголемување на нивните плати, а го чуваат во фиока предлогот на ССМ за зголемување на платите на работниците, рече Трендафилов.
На 12 февруари, ССМ одлучи да ги блокира работодавачите, односно Стопанската комора, Сојузот на стопанските комори и Органзиацијата на работодавачи.
Работниците ќе ги блокираат газдите, онака како што газдите ги блокираат работниците 36 години држејќи ги со мизерни плати и со закани кон нив. Дојде време кога работниците имаат избор, а газдите немаат. Помина времето кога газдите велеа дека работници има на тони, изјавиТрендафилов.
Блокадата на Владата е најавена за 17-ти февруари.
Ќе ги блокираме пристапите за да не може ниту еден претставник на Владата, почнувајќи од претседателот на Владата и министрите, да дојде на седница со удобните службени возила и со возачите и да присуствува. Ќе мора пешки да помине пред работниците и да ги погледа во очи, рече Претседателот на ССМ.
ССМ утре до Собранието на Република Северна Македонија ќе достави иницијатива за измени и дополнување на Законот за плати и други надоместоци на пратениците и на други избрани и именувани лица.