post script-im / Крамер против Крамер и да, СДСМ ќе ја снема ама ќе ги снема и „платформашите”, и ?

Секако дека турболенциите во политиката се амбиент и за внатрешните односи во самите политички партии.

Ама ова што одвреме, навреме и што тука и таму се провлекува во јавноста, нешто преку медиумите, нешто како шпекулации по социјалните мрежи, а нешто и како партиски реакции, излегува дека во европска СДСМ ова не е игра на партиски авторитети за преземање на партискиот трон зашто оваа внатрешно партиска “битка“ наликува на видео игра на осмооделнци и тоа игра со оштетени џоистици.

Мажите од СДСМ кои се против ова и вакво СДСМ, ако си го сакаат СДСМ како што се колнат, прво да си излезат од зад грмушката.

Тоа е примарното.

Да си се легитимираат јавно.

Да си го сторат тоа онака со образ, маалски, или, по скопски, мушки.

И кога веќе сметаат дека се во право, да си се одмрзнат и со аргументи прифатливи за широкото членство и за уште пошироката маса идеолошки поддржувачи, со своите уверливи факти, да се произнесат јавно.

Вака, не толку одамна, слични СДСМ „алтернатвци“ прво ја изродија „Нова СДСМ”.

Си ги устоличија режимецот Груевски и тогашното ДПМНЕ на власт, си се усреќија некокумина оттаму и ја „усреќија”, ја уназадија и Македонија.

Тој нож в грб на нели, европскиот СДСМ, очигледно му беше малку па самиот СДСМ потоа си го изроди и ЗНАМ.

Си ги устоличи неколкумината свои исплакнати од социјалдемократска идеологија и си го поткрепија анти европското ДПМНЕ. Сега ова Мицковово.

Матрицата иста.

Некои партиски „верници“ си ја подкусуруваат својата, нели, европска СДСМ, за свои приватни, за лични интереси, веројатно и џебови.

Само затоа.

И ЗНАМ сега, како и СДСМ „Нова” претходно, се впрегна во бизнис клубот на ДПМНЕ и толку.

Кој ќари, ќари.

А гласачите, а поддржувачите?

Хм, гласачите, хм, хм, поддржувачите …

И сега?

И сега, со уште неидетификувани, некако идентично.

По ЗНАМ , можна СДСМ платформска.

И нека се и најискрени.

И може со право се пројавија со незадоволство, со критики по актуелната водечка сдсмовска гарнитура.

И можеби ова актуелно СДСМ раководство е вмрежено во разно, разни бизнис спреги и можеби партијата им е само лост кон тие цели.

Ама, само можеби.

Затоа, сакајќи, несакајќи, прашањето е дали, како и претходните СДСМ фракции политички партии, ќе заседнат ли и овие најновиеве алтернативциве, во скутот на ДПМНЕ или заедо со своите противници во ова актуелново СДСМ, ќе го урнисуваат антиевропското ДПМНЕ?

Одговорот си го знаат тие.

И е во деновиве пред нас.

Патем, партијата, како и секоја политичка партија, си има свои институции.

Има, веројатно, и свои партиски правила за внатрешно партиски битки за сите теми па и за партискиот трон.

Сеʼ друго, како ова во јавноста со СДСМ платформаши во стилот „неʼ има ама и неʼ нема”, е само јалова меидумска битка на суети.

Само загубено време за нив и за партијата што, впрочем, си е нивна интерена, нивна внатрешно партиска работа но …

Но, нивната битка од зад тарабите, е само загубено време не за нив и не за нивната партија, туку, со ова ДПМНЕ, е време загубено за европска Македонија.