Зоран Иванов
Првиот актуелен човек на СДСМ Венко Филипче денеска во изјавата во рамките на денот на македонскиот јазик, меѓу другото, употреби и формулација која стана сервис топка за владејачката ДПМНЕ.
Горе, долу, парафразирам, рече дека Бугарите не ни го негирале идентитетот или така нешто.
Сакам да верувам и верувам дека тоа што го кажа не го мислеше баш така како што го кажа.
Повозрасните, да не речам постарите како мене, го паметат времето на бугарската академичка Цола Драгојчева.
Институционалната бугарска персона, тогаш главната во историскиот оддел на бугарската академија на науките БАН, инкубаторот на антимакедонството.
Како и секој на својот биолошки крај, жената почина, а Македонците останавме.
Ако добро се сеќавам, ја наследи нејзин антимакедонски клон, извесниот Димитар Димитров.
Човек од истата фалсификаторкска кујна на БАН кој беше уште по жесток во негирањето на македонскиот идентитет.
И тој, како што и на секој неизбежно ќе ни се случи, почина.
И тој почина ама Македенците еве сме.
Нејсе, во бугарската БАН го наследи актуелниов во македонско бугарската историско образовна комисија, дотичниот, демек и тој како и неговите претходници, историчар. Историчар по задача.
За волја на вистината, објективно е да се каже дека такви ги има и кај нас, не дека ги нема.
Но, како и мене и сите, кај и да е, само нека е природно и на нозе и барем со троа ум, ќе го снема и него.
И тој, Ангел, ќе одлета кај ангелите угоре или поради гревовите …
И него, како и неговите претходници водачи на „историческиот“ институт БАН, еден ден, неизбежно, ќе го снема.
Како Македонец, ќе ме нема и мене. А како антимакедонец, ќе го нема и него.
Нас ќе не нема ама Македонците ќе ги има.
И?
И сето, сите тие лаги и сите тие пари, им биле џабе.
Оттука, да заклучам дека и Цола и Димитар и актуелниов Ангел, ќе ги нема. А Македонците, ќе ги има.
Како и до сега, историски и во континуитет, ќе не` има.
Па, сега, од сето, од времето на култниот тоталитарен бугарски сталинист Бај Тошо па наваму, излегува објективноста дека во Живковата, па потоа и во Борисовата, еве сега, се наѕира, и во Радевата бугарска антимакедонска асимилаторска и иредентистичка кампања, се уште егзистираат децениски џабе потрошените милијарди лева, сега евра, на вредните бугарски граѓани и на успешните бугарски компании.
Значи, сето, за џабе.
Џабе кампањи рецидиви од времињата не европски од пред век ипол па и наваму до денес.
Но, тие си знаат.
Таму, на истокот од нас, и натаму туркајте си ги вашите де-мо -де агенди, а ние Македонците, со овдешните ваши „кооперанти” од актуелнава ни власт, ќе си ги туркаме нашите ЕУ агенди.
Да завршам со почетокот на овие редови.
Би било добро Венко Филипче, актуелниот прв човек на про европска СДСМ, да си ја преслуша својата изјавата од пред „Св. Спас“ во која вели дека бугарската страна не ни го негирала идентитетот.
Ова, зашто да, точно е дека веќе цели три, четири години од рамката француска па наваму, бугарската политичка страна не спомнала за јазикот и за идентитетот македонски.
Но и сосема е јасно дека негаторската бугарска политика, како Дамоклов меч и ден денес виси над македонската идентитетска глава како алатка идентитестски и историски да ги запира македонските ЕУ интеграции.
А проевропскиот Филипче, мислам, само мислам, на македонските граѓани треба пронтно, веќе утре, да им појасни што всушност мислеше со изјавата во која, меѓу две запирки, рече дека Бугарија не го негирала нашиот македонси идентитет.
Ова, ако не за друго, туку колку да ја запре забрефтаната кампања на актуелната анти ЕУ власт која оваа Филипчева изјава ја промовира како став на партијата на чие чело е.
Но, како и за се` друго, така и за ова, си знаат таму во партијата.