Белград: Српски војник во Либан утрово починал од тешки повреди предизвикани од израелски проектил кој паднал врз база на ОН во која се сместени мировните сили, објавија локалните медиуми Смртта на припадникот на Војската на Србија, постариот водник Милован Јовановиќ, ја потврди Министерство за одбрана на Србија.
На постариот водник Јовановиќ по ранувањето му била укажана итна медицинска помош во болницата во рамки на базата, а потоа со хеликоптер бил пренесен во универзитетски медицински центар во Бејрут каде што починал, соопшти министерството.
Во нападот биле повредени уште двајца припадници на меѓународните сили. Еден од вооружените сили на Република Ел Салвадор и еден од вооружените сили на Кралството Шпанија, се додава во соопштението.
Постариот водник Милован Јовановиќ е роден на 6 јуни 1989 година во Краљево.
Зад себе остава сопруга и две малолетни деца.
Во Војската на Србија служел од 10 декември 2011 година, а во мировната мисија во Либан бил од јануари годинава, наведува Министерството.
Министерот за одбрана Братислав Гашиќ и началникот на Генералштабот на Војската на Србија, генерал Милан Мојсиловиќ, упатија сочувство до семејството на трагично загинатиот војник.