Во Центарот во Гази Баба има појава на заразни болести, а државата ги држи мигрантите како заложници во услови полоши од притвор, незаконски, со месеци, соопшти денеска Народниот правобранител Иџет Мемети.
Во моментот во Центарот се сместени околу 500 бегалци, а капацитетот на поранешната градинка која се користи како прифатилиште за странци, е за 100 до 120 луѓе. Таму веќе има шуга и вошки. По бунтот кој изби во ноќните часови, ситуацијата привремено е смирена поради ветувањето на Народниот правобранител дека ќе интервенираат.
Никој не знае во кој момент ситуацијата може да ескалира, особено што наближуваат рамазанските пости, а луѓето немаат услови да ги прават постите.
„Затекнавме катастрофална состојба, нехигиенски услови со кои се повредува човековото достоинство. Вчера таму имаше 28 жени и 35 деца, дете без придружба и бремени жени. Условите се полоши од протвор. Мажите спијат на под, без постелнина,жените и децата се сместени во две простории, а дел од нив спијат на подот во импровизирана кујна“, изјави Мемети.
Тој објасни, дека бегалците се жалат дека непотребно се држат таму со месеци, не си го знаат статусот, немаат кавлитетна здравствена заштита бидејќи единствениот лекар што доаѓа таму не може да пристигне да им помогне на сите. Екипата од институцијата Народен правобранител констатирала дека не постои документација, освен еден докумнт на македонски јазик кој не можат да го разберат.
Мемети вели дека мигрантите се жалат и на односот на вработените . Мигрантите се држат со месеци како сведоци во постапките за кријумчарите, иако законот за илегален влез во државата предвидува притвор од 30 дена, односно законот не предвидува дека мора да се држат таму вели Мемемти
„Загрижува лошата комуникација МВР, Јавниот обвинител и Судот. Нема комуникација меѓу министерствата, нема писмена коресподенција меѓу нив, не постојат документи за нивно носење на Суд или Јавно обвинителство, како и за дадена изјава. Недозолива е усната комуникација за статусот на бегалците, мора да постојат документи, “нагласи Мемети.
Тој нагласи дека слабостите на системот не дозволуваат никаква заштита на бегалците и дека е потребно итно донесување на Законот з а азил.
„Евидентно е слабото и непрофесионално менаџирање на МВР и другите министерства, како и државата. Бараме итно донесувањ ена Законот за азил и зголемување на капацитетите. Ние две години укажуваме на слабостите на системот и Македонија има обврска да го направи тоа.
На прашањето на НОВА ,дали ќе го искористат правото да поднесат кривични или прекршочни пријави, Мемети одговори дека ќе ја искористат таа можност во случај да констатираат кривична или друг вид на одговорност.
Утринава тој имал средба со министерот на МВР, Митко Чавков на кој му ги предочил сите слабости, како и можноста да се побара меѓународна организација која ќе помогне. Македонија е должна според меѓународните конвенции да обезбеди хумани услови за бегалците, рече Мемети.
Инаку, Законот за азил за кој се мислеше дека е стигнат во Собрание, воопшто не поминал на седница на Влада, така што најверојатно во понеделник ќе се најде на владина седница. Од потписот на премиерот Груевски ќе зависи дали законот ќе биде спроведен по итна постапка или ќе оди во редовна процедура.