Претседателот на Европската унија Доналд Туск го откажа денешниот самит на 28 лидери на ЕУ.
Туск рече дека само 19-те лидери на еврозоната ќе ги одржат разговорите за кризата во Грција, кои ќе започнат во Брисел во 16 часот по локално време. Разговорите за должничката криза меѓу грчкиот министер за финансии и неговите скептични колеги од еврогрупата беа закажани за 11 часот, во обид да постигнат договор со кој ќе се обезбеди иднината на Грција во еврозоната. Ако не се постигне напредок, би можело да се случи Грција да банкротира и да се сруши надвор од еврозоната.
Грчкиот премиер Алексис Ципрас сака пакет финансиска помош од 53,5 милијарди евра за да се покрие големиот долг на Грција до 2018 година. Но, претседателот на еврогрупата Јерун Дајселблум денеска рече дека дека се уште има „големо прашање на доверба“ и „кредибилитет“ во однос на ветувањата на Грција.
Премиерот на Малта Џозеф Мускат, кој треба да присуствува на самитот на еврозоната во Брисел, предвиде дека денешниов ден „ќе биде долг ден“.
Доверителите сакаат „поконкретни и пообврзувачки ветувања“ од грчката влада, рече еден европски претставник за АП, додавајќи дека предлозите на Атина се „премалку и предоцна“. Министрите синоќа на вонредниот состанок што по којзнае кој пат е свикан за решавање на кризата во Грција, не се срамеле да покажат колку му се лути на Ципрас додека Атина стои на работ на економската бездна пред отворањето на финансиските пазари в понеделник.
Волфганг Шојбле, германскиот министер за финансии, побара, за време на вчерашниот состанокот на Еврогрупата во Брисел, Грција да ги подобри своите предлози за да добие помош.
Ако тоа не се случи, Грција ќе мора да излезе привремено од еврозоната во период од пет години, тврди германскиот дневник “Франкфуртер aлгемајне цајтунг” врз основа на еден германски документ кој Шојбле го донел на состанокот на Еврогрупата.
Според овој документ, во грчкиот предлог недостасуваат повеќе централни и важни реформи за модернизација на земјата и економски траен развој на подолг рок и условите за нова програма за помош не се исполнети. Според весникот има две можно сценарија. Или Грција излегува од еврото за период од пет години во кој ќе го реструктурира својот долг. Или Атина радикално и брзо ќе го подобри својот предлог.
Претходно претставник на владејачката партија во Грција Сириза изјавил за локалната телевизија „Мега“ дека поставените услови пред Еврогрупата од страна на Германија, за да биде доделена нова помош на Грција, имаат за цел да ја понижат Атина, а нивната вистинска цел е да ја соборат владата на Алексис Ципрас.
„Она што се случува е желбата да бидат понижени Грција и грчкиот народ или да биде соборен од власт Ципрас“, додал Димитриос Пападимулис од Сириза, кој е и заменик-претседател на Европскиот парламент.