Документарниот филм „Вања: Со маки сум се родила“ денеска премиерно беше прикажан во Кинотека на Македонија. Филмот е посветен на животот и на делото на легендарната певица Вања Лазарова.
Реализацијата на филмот е на продуцентската куќа „Медиа броадкастинг“ и на Агенцијата за филм на Македонија.
Вања Лазарова е македонска пејачка на изворни народни песни, доајен на македонската народна музика.
Извесно време работела во Операта при МНТ, а била член и на Државниот ансамбл на народни игри и песни „Танец”. Има испеано стотина македонски изворни народни песни, од кои најголемиот дел се снимени во продукцијата на МРТ.
Лазарова има настапувано на голем број концерти на повеќе континенти. Пеела во Алберт Хол во Лондон пред британската кралица Елизабета Втора и премиерот Винстон Черчил. Посебен придонес има во соработката со групата „Анастасија” при создавањето на музиката за филмот „Пред дождот” на Милчо Манчевски.