Тројца претставници на Студентскиот пленум вчера на завршната вечер од „Д фестивал“ во Дојран за време на настапот на Ману Чао го развеаа знамето на Пленумот на главната сцена.
Пленумци велат дека со поддршка на организаторите , тие ја искористиле приликата да му се заблагодарат на легендарниот музичар за неговото бодрење во текот на целата борба против измените во законот за високо образование и да испратат заедничка порака „Нема правда, нема мир“.
Појавувањето на Пленумците на сцената беше проследено со аплаузи од публиката, која во ист глас со нив неколку минути скандираше „Автономија“, по што продолжи забавата.
Ману Чао беше првата интернационална ѕвезда која на неколку дена од прогласувањето на автономна зона на факултетите во Скопје, ја изрази неговата поддршка објавувајќи слика на неговиот фејсбук профил на која пишуваше „Поздрав Пленумци – Скопје“.
Петнаесет дека подоцна артистот повторно објави фотографија со транспарент, на која пишуваше „Од Богота, Колумбија, до Македонија! Продолжете со добриот дух и никогаш не се откажувајте од својата борба! Максимално почитување!“.
Ваквиот потег на Ману Чао го пренесоа голем број на медиуми, а тој вчера доби и огромно „благодариме“ од Пленумците.
Вчерашниот негов настап на јубилејната пет годишнина од „Д фестивал“ го проследија илјадници посетители, а спектакуларниот двочасовен настап беше најавен со огномети.
Освен Ману Чао и неговата „La ventura”, во текот на трите фестивалски вечери посетителите имаа можност да ги слушнат Фулиш Грин, ЗАА, Љубојна Брас Фантази, ПМГ Колектив, Фјурион, Фолтин, Кирил Џајковски и ТК Вондер, како и диџеите на Антена 5.
Сите сместувачки капацитети во Дојран викендов беа преполни, а целосно беше исполнет и фестивалскиот камп, во кој беа поставени шатори и вреќи за спиење. Камперите се жалеа на лошите услови како слаб притисок од тушевите со континуирана ладна вода, и скапите цени на фестивалските вечери.
Шише вода од литар ипол на главната фестивалска сцена чинеше 200 денари, а организаторите на настанот не дозволуваа внесување од надвор ниту на храна, ниту на пијалоци.