Здружението на граѓани „Плоштад Слобода“ во соработка со новинари-истражувачи и во сопствена продукција ќе прикаже нови 5 независни истражувачки видеа на теми поврзани со локалната самоуправа, јавните пари, политики и простори.
Настанот ќе се одржи вечерва во 19 часот во просториите на Чаршиската книжарница, која се наоѓа на самиот влез на Старата чаршија. Ќе бидат прикажани сториите на Жарко Настоски, Мери Јордановска, Харалд Шенкер, Деспина Трајковска и Бојан Стојановски.
Жарко Настоски во својата сторија ја истражува економската логика зад објектите од проектот „Скопје 2014“, како и трошоците за реализирање на бизарниот проект.
Мери Јордановска во својата сторија „Авторството на Скопје2014″ ги истражува политичките и уметничките автори на проектот, дискутирајќи го нивниот ангажман и претходно искуство.
Харалд Шенкер во „Сликата на неквалитетен дискурс” ги истражува грешките во изведбите на скулптурите и другите објекти од „Скопје 2014“, соодветноста на процедурите и можните начини како тие настанале.
Деспина Трајковска навлегува во процедурите и финансиите на Воинот на Коњ и Порта Македонија во својата истражувачка сторија „Капиталните споменици во Скопје 2014″.
Бојан Стојановски се фокусира на загубените зелени површини во центарот на Скопје, Градскиот парк и парк-шумата „Водно“, давајќи историска перспектива на најголемите уништувања на зеленилото во Скопје изминатите години.