Првата странска инвестиција во Македонија, фабриката „Вистеон Електроник“, претходно „Џонсон контролс“ се повлекува од Бунарџик.
Одлуката е донесена врз основа на неколку состојби, како што е падот на продажбата и потребата од преструктуирање на производството, велат од комапнијата и додаваат дека во тек се преговори со повеќе фирми кои би го презеле нивното производство во Бунарџик.
„На 1 јуни Вистеон ги информираше вработените во производствената фабрика во Скопје дека компанијата планира да престане со работа во овие погони до крајот на 2016 година, поради вишок капацитети во европското производство на компанијата“, изјави за Алсат-М, Џона Кристенсен, одговорна за комуникации во „Вистеон“ од Велика Британија.
Џонсон контролс ја отвори фабриката во Бунарџик во 2006 година, а од лани сопственик на фабриката стана „Вистеон“. Според официјалните податоци од 2007 година досега компанијата има загуба од околу 2 милиони евра.
Фабриката во Штип остана во сопственост на Џонсон контролс.
Од Агенцијата за странски инвестиции и промоција на извозот велеа дека тие немаат никаква информација за евентуалното можно повлекување и дека досега односите со нив се одвивале без никакви промени.
Компанијата произведува компоненти и системи за автомобилската индустрија.