Дени Делев и Верица Милушева се принцот и принцезата, кои вечерва ќе ја предводат триилјадната интернационална поворка под маски на традиционалниот Струмички карневал.
Со синоќешниот маскенбал во хотелот Сириус официјално почна годинашниот Струмички карневал 2013. Учесниците на маскенбалот за принц и принцеза на карневалот ги избраа принцот и принцезата кои заедно со кралот, актерот Ване Крстев, ќе ја предводат интернационалната карневалска поворка.
Според Александар Цицимов, претседател на Организацискиот одбор на Струмичкиот карневал 2013, годинава во карневалската поворка ќе има над 2.500 домашни и околу 650 учесници.
Свое присуство на карневалот најавија 26 екипи од соседните земји, а за првпат на карневалот ќе настапи и група од збратимениот град Гроједски од Полска. Традиционално почетокот на карневалот ќе го означи со голем огномет.
Градоначалникот на Струмица Зоран Заев, кој беше маскиран како „оган“, а неговата сопруга Зорица во „мраз“, вели дека Струмица е подготвена и со широко отворено срце ќе укаже добредојде на сите љубители на карневалот.
Во рамките на седумдневните карневалски празнувања утре точно напладне на плоштадот „Гоце Делчев“ ќе продефилираат најмалите карневалчиња.
На претпоследниот карневалски ден, во вторник, кој традиционално беше ден на големиот карневал по втор пат годинава по струмичкото корзо ќе продефилираат наградените маски од Интернационалната карневалска вечер, а наградите на најуспешните ќе им бидат доделени во Домот на културата. Наградниот фонд годинава изнесува 5.380 евра за осум категории.