Вчера во рамките на МОТ беше прикажана представата Време на забава на режисерката Зоја Бузалковска.
Претставата на Бузалковска се осврнува на актуелните состојби во државата илсутрирајќи ја жестокоста на еден режим. Во представата во која публиката имаше можност да слушне и дел од објавените бомби на опозицијата во врска со случајот на Мартин Нешковски, Бузалковска прави експлицитна алузија на актуелните состојби во Македонија.
Бузалковска ја поставува претставата на начин во која доминантна треба да биде жестокоста и насилието, кои се подеднакво, вредност што ја нуди драмскиот јазик на Харолд Пинтер и предзнак што го имаат сите актуелни случувања на отворена пресметка на власта, нејзините послушници и извршители, овој пат во една експлицитно полициска и параполициска држава, со изблиците на отпор и непокор на напредните, смелите, слободните, различните, борците за права, граѓаните, сите оние што ќе одлучат гласно и организирано да го артикулираат својот став спротивен на ставовите на власта.
Претставата Време на забава, се состои од композиција што спојува три едночинки на Пинтер: Планински јазик, Една на заминување и Време на забава, како и една меѓуигра, замислена како интеракција со публиката – кратката едночинка Нов светски поредок. Планински јазик во оваа адаптација станува Комуњарски јазик.
Освен четирите едночинки, претставата содржи и документарни материјали од актуелните настани во Македонија, предизвикани од протестите во мај 2015 година, Во претставата се користат и лични приказни, исповести, јавни изјави, јавно извикувани пароли итн.
Време на забава нуди моќна слика на едно херметично, безглаво општество, преокупирано со својата упадлива потрошувачка и здравствен фашизам, кој е слепо индиферентен за ерозијата на граѓанските права.
Претставата е направена на доброволна основа, без буџет, со голем ентузијазам и со огромна помош на истомисленици. На претставата како гостин се јавува и познатиот борец за човекови права, Мирјана Најчевска.