Социјалната мрежа Фејсбук најави неколку крупни измени насочени кон подобрување на искуството кај корисниците на мобилни уреди.
Измените, кои засега се во фаза на тестирање, се сконцентрирани на профилните страници, кои имаат четири милијарди посети дневно.
Се планира наместо слика, корисникот да може да прикачи кусо видео од седум секунди, видливо за секој што ќе го посети профилот.
„Светот се промени откако ги воведовме профилите во 2004 година. Се повеќе луѓе создаваат видеа, повеќе од кога и да е порано. Почнавме да го тестираме следниот чекор во очигледната еволуција на профилите – профилните видеа. Наскоро, ќе можете да снимите краток филм, кој ќе се пушта и ќе „врти“ кога некој го гледа вашиот профил. Овие видеа ќе ви дозволат да прикажете дел од себе кој не можевте да го прикажете претходно и тие ќе му дадат нова димензија на вашиот профил“, објаснува Фејсбук.
Друг новитет кој го воведува Фејсбук е поставување на привремена верзија на профилната слика, која по одредено време се менува со старата.
Фејсбук најавува и можност да изберете пет фотографии кои ќе се прикажуваат на врвот на вашиот профил.
„Направивме и некои измени во дизајнот на мобилните профили, кои го подобруваат искуството со Фејсбук и подобро ги презентираат информациите за вас и вашите пријатели. Ги поместуваме профилната фотографија и профилното видео напред и во средината на вашите профили. Фотографиите ќе бидат во средината и ќе бидат поголеми, а на врвот на профилот ќе се најдат линковите до вашите пријатели и до нивните фотографии“, велат од Фејсбук.