Најмалку 86 лица загинаа, а 126 се повредени, по двете силни експлозии кои утринава одекнаа во близина на железничката станица во турскиот главен град Анкара, соопшти турското Министерство за внатрешни работи.
Нападот е извршен за време на мирниот протест против конфликтот на турските власти со курдските милитанти на југоистокот на Турција.
Денеска на градскиот плоштад во Анкара било планирано одржување на протестен митинг под мотото„И покрај војната, веднаш сакаме мир. Мир, работа и демократија“.
Собирното место било планирано точно на железничката станица, во близина каде што утринава дојде до експлозии.
Цел на нападот бил мировниот марш на опозицијата која повика на запирање на насилството со курдските сепаратисти, припадници на Работничка партија на Курдистан(ПКК).
Турскиот претседател Реџеп Таип Ердоган силно ги осуди двојните бомбашки напади во Анкара, нарекувајќи ги гнасни и истакнувајќи дека мета на нападот биле единството на државата и мирот. Ердоган повика на одлучност и солидарност како најважен одговор на теророт. Тој порача дека тие што стојат зад нападите имаат за цел да предизвикаат поделби во општеството.
Неколку часа по двете експлозии во Анкара, Курдската работничка партија (ПКК) прогласи прекин на герилските активности во Турција. Групата објави дека нејзините борци ќе избегнуваат акции освен во случај кога ќе бидат нападнати.




