Во Собранието на Република Македонија денеска беше врачена државната награда „23 Октомври“ за 2015 година за остварување во областа на културата и уметноста.
Добитници годинава на наградата се ликовниот уметник Стефан Хаџи Николов, писателот Фејзи Бојку и музикологот, публицист, новинар и музички критичар, Костадин Костадиновски.
Престедателката на Одборот за доделување на наградата, академик Вера Битракова Грозданова изјави дека наградата претставува признание со кое се вреднува придонесот на творештвото на тројцата добитници за нивна лична и за афирмација на сопствената држава.
– Заветот на нашите слободоумни претци многу не обврзува согласно со нивната визија. Се што е досега постигнато треба да се унапредува и во новото време треба да се учествува во рамноправен натпревар со другите, бидејќи само на тој начин може нашето општетство да се вгради во цивилизациските токови на културните нации, рече Битракова Грозданова.
Причината зошто наградата оди кај годинашниве добитници, според образложението, Хаџи Николов им припаѓа на малкуте македонски уметници кои мајсторски владеат со сликарскиот занает.
Писателот Бојку е автор на 14 дела збирки поезија и раскази за деца и младинци, како и на осум научни трудови. Во својата творешка кариера има преведено и 42 дела од македонски, албански, српски и француски јазик, а автор е и на 10-тина тематски емисии за радио и ТВ.
Костадин Костадиновски музикологот, публицист, новинар и музички критичар, се смета за доајен на македонската музикологија. Автор е на пет музички пибликации и творец на неколку музички фестивали меѓу кои Фолк фест Валандово, Интерфест, Тетовски филиграни. Неговиот потпис го носат и повеќе естрадни песни.