На Синедејс вечерва две големи филмски остварувања на двајца светски реномирани режисери- Сокуров и Михалков.
Публиката вечерва ќе може да ужива во последното остварување на рускиот режисер Никита Михалков, филмот „Сончаница“. Приказната се одвива во ноември 1920 година, во еден воен логор на Крим, по евакуацијата на Белата армија, кога неколку десетици илјади белогардејци биле оставени на полуостровот. Офицерите не знаат каква судбина ги очекува и чекаат да им пресуди Црвената армија. Еден од нив, неименуван капетан (Мартинш Калита), е прогонуван од сеќавањата на една драматична и куса романса од 1907 година и тој се обидува да сфати како се распаднала Руската Империја и кој е виновен за тоа. Неговото измачување запира кога сите офицери белогардејци се качуваат на една стара лаѓа, којашто црвеногардејците ја потопуваат во Црното Море, и сите офицери исчезнуваат.
Филмот ја освои наградата за најдобра кинематографија на Шангајскиот меѓународен филмски фестивал а тој е и кандидатот на Русија за „Оскар“ во категоријата „најдобар филм од неанглиско говорно подрачје“. Михалков е веќе добитник на наградата „Оскар“ за филмот „Изгорени од сонцето“. Проекцијата на филмот на Михалков е во Кино Милениум во 22.00
Претходно во истата кино сала во 20.00 публиката ќе може да го види новоти филмско осттварување на Сокуров.
“Франкофонија” на Сокуров ја истражува врската помеѓу уметноста и моќта и прашува што уметноста кажува за нас, во срцето на една од најужасните војни што некогаш се случиле на светот. Во филмот се раскажува приканата за Жак Жожар и грофот Францискус Вулф Метерних кои во екот на војната, кога се се урива и се брише, работеле заедно за да го заштитат и зачуваат богатството на музејот Лувр. Филмот на Сокуров е добитник на наградите Мимо Ротела, Федора и Награда за најдобар Евро-медитерански филм на Меѓународниот Филмски фестивал во Венеција.