Брисел и утре, четврти ден по ред, останува во вонредна состојба на висок аларм поради “иминентната опасност за терористички напад”, најави пред малку премиерот Шарл Мишел.
Одлуката е донесена по евалуацијата на организмот за предупредување на терористичка закана и степенот на аларм останува на 4 од можни 4 степени во Брисел. За другите делови од земјата останува на сила степенот 3.
“Можните места за терористички напад се истите како и досега: јавен транспорт, трговски центри и улици. Одлучивме исто така да го намалиме бројот на големите настани на кои се собираат многу луѓе”, рече премиерот по повеќечасовен состанок со другите членови од владата и безбедносните служби,
Премиерот од граѓаните побара посебна внимателност во јавниот транспорт. Овие мерки ќе останат на сила до следниот понеделник но од среда е најавено отворање на училиштата и другите образовни институции.
Најавено е исто така постепено отворање на метрото во Брисел кое е сосема затворено од саботата наутро.
На теренот и понатаму ќе има големо присуство на полицијата и армијата и тоа насекаде во земјата.
Според Мишел, целта е полека животот на Белгија и особено во Брисел да се врати во нормала што е можно побрзо.
Премиерот не сакаше да даде повеќе информации од истрагата.
Во меѓувреме 15 од 16 лица уапсени во синоќешната акција беа пуштени и само едно лице беше обвинето за тероризам и учество на париските атентати.
Премиерот не сакаше да ги потврди извештаите на медиумите според кои човекот по кој трага белгиската но и европските полиции Сала Абделслам зборувал со луѓе од Сирија и рекол дека останува во Белгија затоа што “сака да ја заврши започнатата работа”. Нема никаква официјална потврда дека оваа информација е точна.




