Гласоечкото, машко двогласно пеење од Долни Полог, Тетовско, е впишано во Листата на УНЕСКО за нематеријално културно наследство на човештвото за ургентна заштита.
Како што соопшти Министерството за култура, одлуката е донесена на Меѓувладиниот комитет на Конвенцијата на УНЕСКО за заштита на нематеријалното културно наследство на човештвото, која се одржува од 30 ноември до 5 декември во Намибија.
„Гласоечко, машко двогласно пеење од Долни Полог“, е традиционална форма на вокална музика, специфична за овој регион. Ова карактеристично полифоно пеење, кое со генерации се пренесува усно, се препознава како симбол на културниот идентитет на македонскиот народ од овој регион кој токму во гласоечките песни ги вградил својата историја, митологија, традиција и култура.
„Гласоечко“ е трето културно добро од Македонија, кое за многу кратко време се најде на листата на заштитени добра на УНЕСКО. Од пред две години, првото културно добро е уникатниот верски обичај од Штипско, „Четрсе“, кое се најде на Репрезентативната листа на УНЕСКО за нематеријално културно наследство на човештвото, а од минатата година е и македонското оро „Копачка“.