Три лица се повредени изминатата вечер во напад на маж вооружен со мачета во лондонското метро, а полицијата инцидентот го третира како терористички акт.
Како што известуваат британските медиуми инцидентот се одвивал на постојката на лондонската подземна железница Лејтонстон, каде биле ранети тројца.
Според очевидци, напаѓачот извикувал „Ова е за Сирија“. Припадниците на полицијата кои брзо интервенирала, го совладале напаѓачот.
Скотланд јард соопшти дека лондонската полиција го квалификува нападот како тероризам.
Претходно во саботата британските медиуми објавија дека тамошните безбедносни служби ги проверуваат медиумските извештаи дека притаената терористичка ќелија која ги организираше нападите во француската престолнина Париз на 13-ти ноември во кои беа убиени 130 луѓе, имала контакти со лица во Велика Британија.
Мерките за безбедност во Велика Британија беа засилени веднаш по нападите во Париз како превентива од терористички масакар во Лондон.
Досега најголемиот терористички напад во Велика Британија беше изведен во јули 2005 година, кога самоубијци беа причината за смртта на 52 лица во лондонската подземна железница и во автобус.
Во Велика Британија е прогласен висок степен на опасност според кој „многу се веројатни“ терористички напади поради заканата којашто ја претставува џихадистичката Исламска држава, како и нејзините следбеници во земјата.




