Студентите од Студентскиот пленум и Младинската организација „Мугра“ утрово го блокираа влезот на Ректоратот на Универзитетот „Кирил и Методиј“, револтирани од дрвосечата и најавената изградба на двете згради за факултетите ФИНКИ и за физичка култура.
Како што појаснуваат, тие не се против изградба на факултети, туку дека оваа одлука е избрзана и студентите не се консултурани за неа.
Тие денеска истакнаа пет барања, од кои првото е одговорност и оставка од ректорот на УКИМ, Велимир Стојковски, поради „немање капацитет да застане во одбрана на универзитетската автономија и интересите на академската заедница“.
Тие исто така бараат, деканите од Правниот, Економскиот, Филозофскиот, Филолошкиот и Архитектонскиот факултет веднаш да излезат со став за ситуацијата.
Студентите бараат и свикување на вонредна јавна седница на Сенатот при УКИМ, на која ќе присуствува и предвидениот број студенти, според Законот за високо образование и Статутот на УКИМ.
– Бидејќи Студентскиот Парламент не е легитимно и легално тело во моментов, ние бараме тие места да бидат пополнети со делегати од Студентискиот пленум и „Мугра“, велат претставниците на студентите.
Воедно од Ректоратот и Сенатот при УКИМ се бара да се спречи започната изградба и да се прогласи проектот за неважечки. Студентите се поготвени да учествуваат во изнаоѓање на соодветно решение за овој проблем, кој нема да ја наруши загарантираната автономија на Универзитетот и ќе ги задоволи урбанистичките стандарди.
Во рамките на своите активности, тие остварија средба со проректорот, професорот Петрушевски по која констатирано е дека ректорот Стојковски е оној кој може да постапи по барањата на студентите.
– Се додека најпрво ректорот не прати допис, бидејќи е надвор од земјата, и не го спречи моментланото градење на територија на УКИМ, блокадата ќе продолжи, изјави Владо Данаилов, претставник на „Мугри“ кој изрази надеж дека ректорот Велимир Стојковски ќе одговори на нивните барања.
Како што објаснија тие пред новинарите, утрово кога го блокирале влезот на Ректоратот, дошла полиција, која според нив, според Уставот, нема право да влегува во кампусот без претходна согласност од надлежните од УКИМ.