Македонија е рангирана 47 од вкупно 166 рангирани земји во извештајот за индексот на економски слободи објавен денеска, а изработен од Фондацијата Херитиџ и Вол Стрит Журнал. Како и минатата година, Македонија останува во категоријата економски умерено слободни држави.
Македонија има вкупна оценка 67,5 поени што е подобрување за 0,4 поени во однос на минатата година. Од балканските држави Македонија е рангирана прва.
Извештајот заклучува дека подобрувањата во законодавството креираат стабилна клима за домашните и странски инвеститори. Забележани се подобрувања во однос на фискалнатта слобода, трговската слобода и ефикасноста на регулаторите, додека „загриженост претставуваат имотните права и корупцијата.
-Иако законодавната рамка во Македонија е добра, спроведувањето на правото е слабо и јавноста е скептична околу волјата на власта да ги гони функционерите за корупција. Полицијата, судовите, високото образование и здравството се гледаат како најкорумпиран сектори. И покрај тоа што постои законска основа за заштита на сопственичките права, спроведувањето е проблематично, се вели во извештајот во делот на владеењето на правото каде што оценките за заштита од корупција и имотни права се 35, односно 44, што ја става земјава во неслободни во однос на овие две прашања.
Високи оценки има во делот на трговската и монетарната слобода, односно 86.4 и 83.5.