Тексашкиот сенатор и тврдокорен конзервативец Тед Круз победи на првите партиски избори во Ајова. Тој го порази милијардерот Доналд Трамп со 28 проценти од гласовите, додека Трамп доби 24 проценти. Круз изјави дека ова прво гласање било „показател дека гласачите нема да дозволат републиканскиот кандидат да биде избран од медиумите, од естаблишментот во Вашингтон и од лобистите“, а овие „рафали“ беа насочени пред се кон Трамп и кон партиската елита во која не важи за омилен.
Американските медиумите пишуваа дека ова е голем пораз врз Трамп кој од стартот на трката со месеци водеше пред другите републикански кандидати.
Кај демократите, пак, Хилари Клинтон и Берни Сандерс се изедначени, односно таа води со само 0,5 поени пред него. Клинтон доби 49,9, а Сандерс 49.4 проценти од гласовите.
„Пред девет месеци дојдовме во оваа прекрасна држава без пари, без никаква политичка организација, без признание. Во Ајова започна политичката револуција, дека оваа земја им припаѓа на младите, на работниците, постарите, на граѓаните, а не само на милионерите “, рече Сандерс обраќајќи се во Ајова.
Американските медиуми пишуваат дека гласањето во Ајова докажа дека Клинтон може да се победи, а аутсајдерот Сандерс кој самиот собира донации од граѓани, но не и од корпорации, веќе е важен играч во трката. Дали демократите го потценија Сандерс, останува следно да се потврди и во Њу Хемпшир.