Првата асоцијација на секое мало дете кое има љубов кон кошарката е американската НБА, а таа секогаш знаела како да им го подготви збогувањето на своите легенди.
И додека во фудбалот децата сонуваат да станат Зидан, Меси, Роналдо, Бекам…во кошарката се Мајкл Џордан и секако човекот на кој минатата ноќ колегите му приредија легендарно збогување – Коби Брајант.
Синоќешниот натпревар на најголемите ѕвезди во НБА лигата (All-Star) за Брајант беше 18-то а 4 пати го освои признанието за најкорисен играч (MVP) на натпреварот. Во 2008 година беше најкорисен играч во целата лига, 2 пати беше MVP во големото финале со Лос Анџелес Лејкерс а има дури 5 шампионски прстени.
– Коби, патот тука завршува. Беше неверојатен ментор за мене, му порача на видео порака еден од најперспективните играчи во Нба денес, крилото од Индијана Пејсерс, Пол Џорџ.
– Ти благодарам за се што направи за оваа лига. Ти си причината зошто секој пат се повеќе се трудам, му порача центарот на Детроит Пистонс, Андре Драмонд.
Пораката од плејмејкерот на Лос Анџелес Клиперс гласи: „Не секој ден доаѓаат момци како Коби. Ќе и недостигаш на оваа игра“.
– Горд сум што сум ти пријател и брат, му порача Шпанецот По Гасол, кој заедно со Коби во Лејкерси освојуваа титули.
– Коби, направи се што можеше за оваа игра и си вечен шампион, легенда која оди, му порача Кевин Дурант, една од најголемите ѕвезди во моментов во НБА.
И секако на крајот следуваше порака од крилото на Кливленд Кавалирс, Леброн Џејмс, кој по својата игра и моќност која ја демонстрира во НБА, се смета за наследник на Коби Брајант.
На крај следуваше порака од легендата на Лејкерси, Меџик Џонсон, кој на Брајант му порача: „Никогаш повеќе нема да има друг Коби Брајант“.