Европратениците Иво Вајгл, Ричард Ховит и Едуард Кукан вчеравечер пристигнаа во Скопје во еднодневна спасувачка мисија на пржинскиот договор, којашто воедно ќе биде и последен обид да се спаси истиот и да се одреди датум за избори прифатлив за сите страни.
Нивното доаѓање прв го најави шефот на Делегацијаа на ЕУ во Македонија Аиво Орав, кој истакна дека по неуспешните разговори на амбасадорите на САД и ЕУ со партиите, ова е последна шанса за договор.
Вчера и СДСМ и ВМРО-ДПМНЕ ги истакнаа уште еднаш своите ставови за одењето на избори на 24 април. За ВМРО-ДПМНЕ друг датум не неприфатлив, а за СДСМ 24 го има истиот третман поради, како што велат, неподготовеноста на ДИК да го заврши прочистувањето на изборниот список навреме и неизнаоѓањето на решение за медиумите.
Ден претходно, во неделата попладне, во извештајот од проценката на САД и ЕУ за подготвеноста на институциите да се одржат кредибилни и фер избори на 24 април се заклучи дека подготовките не се доволни. И Државната изборна комисија соопшти дека им треба уште време за прочистување на избори со оглед на тоа што тие започнале со работа 20 дена подоцна од предвиденото. ВМРО ДПМНЕ соошти дека извештајот на амбасадите не бил аргументира и оти имало услови за фер и демократски избори.
Опозицијата веќе најави дека нема да учествува на избори на 24 април, а истакна и дека тие самите нема да бараат од Собранието да ја повлече одлуката за избори на тој ден, туку порача тоа да го сторат тие што самите поднеле таква иницијатива, алудирајќи на владејачките партии. Ако денеска не се покрене иницијатива за повлекување на оваа одлука, ноќеска на полноќ се распушта парламентот и официјално започнува изборна кампања.