Документарниот филм за проектот на познатата уметница Марина Абрамовиќ кој се одржа во 2010 година во Музејот на модерна уметност во Њујорк, „Марина Абрамовиќ: Уметникот е присутен“ е награден со престижната „Пибоди“ награда (The George Foster Peabody Award). Ова признание се доделува за извонредни дстигнувања во областа на радио и телевизиската продукција.
Документарецот за Абрамовиќ е опишан како провокативна и интимна приказна за уметницата што го „измисли“ перформансот. Иако овој филм од 2012, во режија на Метју Ејкерс и Џеф Дупри, досега е прикажан на бројни филмски фестивали и освои многу награди меѓу кои се истакнува на наградата на Берлинскиот филмски фестивал, овој пат филмот е награден во категоријата на тв продукција бидејќи бил прикажан на кабловската мрежа HBO.
Во меѓувреме Марина Абрамовиќ, најави нов уметнички проект со кој ќе зачекори на полето на науката.
Концептот на проектот, кој ја спојува уметноста и неврологијата Абрамовиќ го демонстрираше во рамки на радио интервјуто за њујоршкото радио WNYC, а при тоа учествуваше во експеримент заедно со водителот Брајан Лерер. Двајцата на главите имаа безжични сензори кои ги забележуваа нивните мозочни бранови, а потоа комјутерски ги споредија.
Целта на перформансот е обид за ширење на полето на информации за невербалната комуникација, како и истражување на трансферот на енергијата меѓу перформерот и публиката.