Обновената хит-претстава „Солунски патрдии“ од вечерва е повторно на репертоарот на на Драмскиот театар. Новата верзија на претставата е работена по текст на Миле Попоски, во режија на Коле Ангеловски. Костимите се на Лира Грабул, сценографијата на Илина Ангеловска, музиката на Џенгиз Ибрахим, кореограф е Гордана Деан
„После триесетина години од премиерата ми предложија да направам „Ри – мејк“ на таа неповторлива претстава?!
Првата реакција беше: „Не, блегодарам… тоа не се повторува“. Немам таква актерска екипа, (а тоа навистина ќе треба долго време да помине, а можеби и никогаш нема да се случи, на едно место да се соберат, такви мајстори и бардови на театарот, а особено на комедијата), јас, бидејќи и самиот играв во претставата и секој детал го знаев напамет, не сакав да правам копија, а и немав некаква посебна идеа од каде би почнал.
Од театарот инсистираа и еден ден, нешто светна. Добро, ќе направиме сосема нова претстава и комплетно нов дизајн. Дејствието ќе го ставиме во триесетите години на минатиот век во времето на тангото. А во „Патрдиите“ страста и љубовта се главните двигатели на дејствието. Освен Цанде и Сотка, сите други ликови, и машки и женски, ќе ги играат женски актерки, ќе носиме машки алишта, ќе лепиме бради и мустајќи и ќе играме танго“, вели режисерот Ангеловски
Актерската екипа ја сочинуваат: Марија Спиркоска-Илијеска, Билјана Драгичевиќ-Пројковска, Маја Вељковиќ-Пановска, Зоран Љутков, Златко Митрески, Јелена Жугиќ, Трајанка Илиева-Таци, Калина Наумовска, Гордана Ендровска, Марија Кондовска, Валдета Исмаили, Душица Стојановска, Викторија Анѓушева, Катерина Коцевска, Катерина Шехтанска-Лаковска и Александра Павлова.
Според легендарната претстава „Солунски патрдии“, беше снимена и ТВ-серија исто така во режија на Ангеловски, во 1980-тите години во Драмски беше апсолутен рекордер по бројот на изведби. За точно три децении (1979/2009) се играла 335 пати.