Позицијата на Македонија во однос на медиумските слободи падна од групата делумно слободни во не слободни по објавувањето на материјалите кои индицираат на опсежно и незаконско прислушување од страна на Владата на новинари, за корупциска поврзаност меѓу функционери и сопственици на медиуми и како резултат на зголемениот број закани и напади врз медиумските работници. Македонскиот медиумски пејсаж е длабоко поларизиран по политичка поделба. Присутна е автоцензурата кај новинарите, главно како резултат на притисокот од сопствениците на медиумите со конкретни бизнис или политички интереси и во поново време како резултат на следењето. Новинарите се слабо платени и се соочуваат со закани и со злоставување поради истражувачко или критичко известување. Ова е заклучокот во Извештајот за 2016 година на Фридом Хаус, за Македонија.
Клучен настан – прислушувањето
– Во февруари 2015, лидерот на опозицијата Зоран Заев ја обвини владата на премиерот Никола Груевски за спроведување опсежна операција на прислушување каде цел се и над 100 новинари, заедно со илјадници други лица.
– Заклучоците на истрагата поддржана од Европската комисија ги поткрепија тврдењата на Заев.
– Заев исто така откри серија снимени разговори кои сугерираат дека владини претставници имале улога во одлучувањето за она што ќе биде објавено во јавните и во некои привтни медиуми.
– Бројни новинари добиле закани или биле цел на физички напади во текот на годината.
Во заклучоците, Фридом хаус наведува дека иако ситуацијата не е драматична како во случајот со Шарли Ебдо во Франција сепак, нападите врз новинарите во Западен Балкан придонеле кон вкупниот пад на медиумски слободи во Европа.
– Нападите и смртните закани во Македонија и Босна и Херцеговина исто така предизвикуваат загриженост со бројни случаи во кои цел се новинари кои истражуваат корупциски случаи во кои е инволвирана Владата, се вели во Извештајот на Фридом Хаус за 2016 година.
Македонија е единствената земја во регионот, заедно со Турција, која е во групата неслободни земји. Сите други се во групата делумно слободни.
Исто така Македонија е една од земјите кои во минатата година забележале најголеми падови. Меѓу нив се Турција, Бангладеш, Бурунди, Франција, Србија, Јемен, Египет и Зимбабве.