Само во Република Македонија е можно за три месеци да се зголеми јавниот долг за 105 милиони евра, а секторот за јавен долг и Министерството за финансии со манипулации да се обидат да прикажат дека јавниот долг се намалил. Како и секогаш во последните осум години продолжуваат да манипулираат со износот на проектираниот бруто домашен производ, за да прикажат понизок износ на јавниот долг како процент од БДП, вели дополнителниот заменик министер за финасии во оставка Кире Наумов.
Наумов во писмената изјава истакнува дека никаде во светот износот на јавниот долг како процент од БДП во соодветниот квартал, не се пресметува во сооднос со проекцијата за растот на БДП до крајот на годината, туку се пресметува врз основа на податоците за последните четири квартали.
– Во нормални околности износот на проектираниот БДП во овој момент треба да изнесува 9.176,3 милиони евра, како збир на предвидениот БДП од прв квартал од 2016 година со соодветниот раст и реализациите од вториот, третиот и четвртиот квартал од 2015 година. Новиот историски износ на јавниот долг од 4,33 милијарди евра е всушност 47,2% од БДП, што е уште еден историски неуспех на креаторите на економските политики во Р.Македонија, вели Наумов.