Велика Британија сонува да стане Албанија! Нашата албанска сосетка стана топ тема во Брексит кампањата, толку голема што дури и албанскиот премиер се почувствува повикан да се замеша.
Британците ке излезат на референдум на 23 јуни за да кажат дали нивната земја треба да остане членка на Европската унија или за неа е подобро да го напушти европското друштво. Според анкетите исходот е неизвесен, пола Британци се за а пола се против.
Министерот за правда Мајкл Гоув сака земјата да излезе од Унијата и даде автогол со контра ефект кога на извесен начин стави знак на еднаквост помеѓу Велика Британија и … Албанија!
Според неговата визија, Британија, ако излезе од ЕУ, ќе им се придружи на земји како Босна, Украина или Албанија. Овие земји, рече Гоув, слободно тргуваат до Унијата но не се приморани да ги применуваат европските правила. Тоа ќе биде во срцето на нашиот нов аранжман со Унијата, рече Гоув.
Ете тоа се според Гоув, среќните балкански земји кои имаат пристап до европскиот пазар но не се обврзани да ги усвојат сите правила на внатрешниот европски пазар.
Фајненшл Тајмс забележа дека човекот не ги дал како пример просперитетните Норвешка и Швајцарија затоа добро знае дека овие земји мораат да ги применат европските правила на внатрешниот пазар за да им се отворат портите на тој ист пазар.
Противниците на Брексит го искористија овој министерски автогол за својата кампања па сега низ Лондон циркулираат автобуси на кои пишува: “Ако излеземе од Унијата ќе станеме како Албанија”. На плакатите може да види албанското знаме кои се вее на кралската Бакингем палата.
И така Еди Рама, албанскиот премиер, им кажа на Британците дека неговата земја не е модел за Британија:
“Можеби треба да бидам горд што Албанија стана централна тема во британската дебата, но кога слушам дека Мајкл Гоув сака да го напушти партнерството со Франција или Германија и да влезе во партнерство со Албанија, морам да кажам дека се чудам, напиша Рама во британскиот Тајмс.
А Фајненшл Тајмс раскажа интересна случка. Уредникот на весникот бил на вечера со Еди Рама кој на новинарот му раскажувал како било во времето на Енвер Хоџа. И рекол дека престанал на својот син да му ги раскажува тие кошмарни времиња бидејќи детето не можело да верува и го гледало таткото како да е луд.
Британскиот хумор на новинарот доведе до следниот заклучок: можеби идните генерации на британски деца ќе ги гледаат своите татковци како да се луди и нема да веруваат дека еден ден во минатото еден британски министер сонувал Велика Британија да стане Албанија.