Инфраструктурата, конкурентноста, мобилноста и доброто управување се четирите приоритети на кои ќе се концентрираат владите од Западен Балкан со Регионалниот совет за соработка (РСС) во текот на годинава – изјави денеска во Сараево генералниот секретар на РСС Горан Свилановиќ.
Крајната цел е поконкурентен регион преку полесниот проток на капитал, човечки ресурси, стоки и услуги на Западен Балкан, но и во поширокиот регион и надвор од него. Со тоа ќе се помогне и процесот на интеграција во ЕУ, додаде Свилановиќ, кој модерираше со еден од панелите на Конференцијата „Сараево бизнис форум“, посветена на зголемување на соработката во индустрискиот сектор и на економската соработка со Кина.
Во изминатата година Советот работеше на подготовките на концептот на „економски коридори“, што ќе биде претставен на самитот на шесте земји на Западен Балкан што ќе се одржи во јули годинава во Париз.
РСС е меѓувладино тело на Процесот за соработка во Југоисточна Европа (SEECP), во кој активно партиципира и Република Македонија.