Published: Saturday, May 28, 2016 20:27
Како и секој ден, и денес Шарената револуција се собра пред Специјалното јавно обвинителство во 18 часот.
Овој пат слоганот е “Шарена револуција против шарената аболиција” како што демонстрантите ја нарекоа вчерашната одлука на претседателот Иванов за повлекување на аболицијата за само 22 лица кое се, како што тој рече, “политички експонирани”.
На денешниот дневен ред на Шарената револуција денес се наоѓа и “журка” пред полициската станица “Беко” во центарот на Скопје. Забавата носи наслов „Информативен разговор“. Демострантите сакаат да му овозможат на министерот за внатрешни работи Митко Чавков да може да им ги постави сите прашања кои го интересираат на учесниците на „Шарената револуција“.
Собирот пред полициската станица „Беко“ се одржува во знак на солидарност со активистите и учесниците во Шарената револуција кои добија прекршочна казна поради фрлање на боја врз објектите од “Скопје 2014”.
На пат кон Собранието, на една од крстосниците демонстрантите напишаа „Информативен разговор“ со стрелка во насока на полициската станица „Беко“. Имаше обид за мал инцидент, кога еден граѓанин им упати забелешка на демонстрантите „Вие сте срам за државата“.
Од граѓанското здружение „Протестирам“ порачуваат дека нема да дозволат „Поигрување на претседателот со правдата“, а нема да запрат ниту со протестите додека аболицијата не се повлече целосно.