Високата претставничка за заедничка надворешна и безбедносна политика на ЕУ, Кетрин Ештон, во вторник доаѓа во Скопје, јавува Телевизијата 24 Вести.
Посетата е директно координирана и со официјален Вашингтон. Ештон во Скопје ќе дојде од Белград. Ќе се обиде да издејствува договор за клучните предуслови што ги имаат двете метрополи за напредокот кон ЕУ – Белград во договорот со Приштина, а Скопје во разговорите за името.
Посетата на Ештон на Скопје ќе биде фокусирана на динамиката на разговорите за името, особено по последниот предлог на Нимиц, соопштен вчера во Њујорк.
„Горна Република Македонија“ според грчките медиуми е предлогот што Нимиц вчера го ставил на маса пред Јолевски и Василакис.
Дојче Веле на грчки јазик, повикувајќи се на извори во Обединетите нации, вели дека името содржи географска одредница, но таа наспроти грчките позиции стои пред одредницата за уредувањето „Република“, па многу лесно би можела да биде изоставена.
Во поглед на употребата, според Дојче Веле, предлогот не предвидува едно име за севкупна употреба или „ерга омнес“ како што бара Грција, туку „најширока можна употреба“ на новото договорено име. Грчките официјали претставници за сега молчат и не го коментираат предлогот, иако според медиумите во Атина, не се задоволни од понуденото решение. Предлогот не го коментираат ниту властите во Скопје затоа што тоа било во интерес на процесот.
Според грчките медиуми, во Обединетите нации веруваат дека е важно што новиот предлог на Нимиц има географска одредница, а нејзината позиција се смета за ирелевантна, како и дека ова е најдобар можен предлог кој ги задоволува барањата, но и бара одреден компромис и од двете страни. „Ако го одбиете овој предлог, навистина не знам каде ќе одиме понатаму“, изјавил висок западен дипломатски претставник на кој се повикуваат медиумите во Атина.