Пратениците од Хрватскиот парламент со огромно мнозинство гласови му изгласаа недоверба на премиерот Тихомир Орешковиќ, со што автоматски предизвикаа и пад на владата и можност за одржување вонредни парламентарни избори.
125 пратеници го поддржаа предлог за отстранување на Орешковиќ, 15 беа против а 2-ца беа воздржани. Изгласаната недоверба за премиерот Орешковиќ е кулминација на длабоката политичка криза и жестокиот судир меѓу коалиционите партнери, Хрватската демократска заедница и движењето МОСТ.
Кризата во односите ХДЗ-МОСТ ексалираше по обвинувањата за конфликт на интерес против потпретседателот на владата и лидер на конзервативците, Томислав Карамарко, заради бизнис врските на фирмата во која работи неговата сопруга со Јосип Петровиќ, познат лобист на унгарската нафтена компанија МОЛ, која е во судски процес со хрватската држава заради спорот околу хрватска нафтена компанија ИНА.
Орешковиќ во своето обраќање истакна дека права причина за соборување на неговиот кабинет е што поради заштита на националните интереси почнал да работи на решавање на спорот Ина-МОЛ со арбитража и отпочнал нови преговори, а тоа на некого не му одговарало.
– Не е тајна дека моите ставови околу Ина, ЛНГ и енергетскиот сектор важно се разликуваат од ставовите на некои членови на владата и дека цврсто ги бранев бидејќи длабоко сум свесен за важноста на Ина и за енергетскиот сектор што ја имаат за нашата економија и се борев да ги заштитам нашите витални интереси, посочи Орешковиќ.
Со падот на владата почнува да тече уставниот рок од 30 дена во кој парламентарните партии би можеле да се обидат да формираат ново мнозинство и да именуваат нов премиер и влада.
Ако не успеат, претседателот на Собранието го известува претседателот на Хрватска дека веднаш ќе го распушти хрватскиот парламент и ќе повика на парламентарните избори, кои може да се одржат не порано од 30, а најдоцна во рок од 60 дена од денот на распуштањето на Собранието.
Најавено е дека претседателката на Хрватска Колинда Грабар Китаровиќ ќе почне консултации со парламентарните партии денеска.