Skopje Pride Weekend 2016 се одржува по четврти пат во Скопје, а годинава во организација на Коалицијата Сексуални и здравствени права на маргинализираните заедници и ЛГБТИ-Центар за поддршка при Хелсиншкиот комитет. Партнери на овогодишниот Викенд се Младинскиот образовен форум – МОФ и Кино Култура (Локомотива). Поддржано од Амбасадата на САД и Амбасадата на Франција.
Целта на серијата настани во рамки на Викендот на гордоста е да креираат простор за да промовираат, ненормативни форми на светоградење, односно релации, афекти, идентитетски позиции, телесни стилови и сензибилитети кои во рамки на хетеронормативното, националистичко и неолиберално капиталистичко опкружување се означени како настрани, изопачени, изродни, ненормални, неуспешни, патолошки, чудни итн.
Тргувајќи од претпоставката дека интерсекционалноста е клучна парадигма преку која се конструираат сите идентитетски позиции, вклучително и родовите и сексуалните, намерата на овој настан е да понуди радикална и многустрана критика на бинарниот родов систем, хетеронормативноста и националистичката хомофобија, како и испреплетувањето на овие режими на дисциплина, контрола и опресија со класата, етницитетот, расата, и здравствениот статус.
Носечка момент на овој настан е „квир“ парадигмата. Да се биде „квир“ е многу повеќе од сексуалноста и родовоста кои може да се идентификуваат. „Квир“ или настраноста означува начин на живот, уметност на стилизација на сопствениот и колективниот живот, политичка алатка и став кои се спротиставуваат на доминатните модели на знаење и моќ преку кои се оркестрираат сексуалните и родовите идентитети како “нормални“ и “девијантни“, односно “настрани“.
„Настраната политичка ориентација и критика ги преиспитува сите наши желби и аспирации за конформизам и нормалност, вклучително и основните претпоставки, вредности и репрезентации на љубовта, интимноста, системите на сродство, капиталистичката компетитивност и егоизам, фетишизацијата на стоката, па се до современите дискурзивни перформанси на државата-нацијата“, велат организаторите.
Носечката идеја на годинешниот „ Викенд на гордоста“ е СОЛИДАРНОСТА, како политичка, социјална и етичка позиција која овозможува да се градат алијанси и колективи на отпор, оттаде органичувачките идентитетски позиции и исклучувачко групни интереси, без притоа да се нивелираат спецификите на различните проживеани искуства на опресија и исклучување.
Во рамки на овогодинешниот Викенд на гордоста во четврток ќе одржи Дебата АРГУМEНЕТИРАНО ИЗРАЗУВАЊЕ, во соработка со МОФ како организатори и развивачи на концептот за АРГУМЕНТ, петок е резервиран за Перформанс на Борјана Роса (Бугарија/САД) – ВО ФОКУС: ВНАТРЕШНОСТА, во сабота од 21:00 – 22:00 се одржува Перформанс / Предавање на Vaginal Davis (САД) – Sassafras, Cypress & Indigo—Black Screen Images and the (e)motive Notion of Freakiness . Истата вечер е предавање на Ана Мишковска Кајевска- “14 години подоцна: Историскиот развој на ЛГБТ активизмот во Македонија“ – , а во недела Целовечерна забава со The John и Новиот почеток, DJ сетови: Виолета Качакова, Хада Блам, Соња Исмаил.