Најмалку 36 луѓе загинаа, а над 150 се повредени во синоќешниот терористички напад на најголемиот аеродром во Турција, Кемал Ататурк во Истанбул.
Официјални претставници прогнозираат дека бројот на загинати ќе се искачи на најмалку 50, бидејќи голем број од повредените се во критична состојба.
Турскиот премиер изјави дека зад нападот најверојатно стои Исламската држава.
Очевидец за турските медиуми изјави дека еден од напаѓачите прво пукал со автоматска пушка во делот на поетувањето, по што тројцата се разнесле во делот каде што пристигнуваат патниците еден кат подолу. Сите биле облечени во црно и не носеле маски.
На видео снимките од патниците се гледаат мртви тела дури и на улицата пред зградата на терминалот. На друга видео снимка се гледа моментот кога еден од самоубијците го детонира екслпозивот на себе, откако претходно полицијата пука во него.
Нападот на истанбулскиот аеродром кој е трет по фреквентност во Европа е со најголем број жртви од серијата напади што во последно време се случија во Турција.
Од нив два беа самоубиствени напади на турстички локации, за кои одговорноста ја презеде Исламската држава и два напади со автомобил бомби во Анкара за што одговорноста ја презедоа курдските бунтовници.