https://www.youtube.com/watch?v=tblhnIllntc
Сондата Џуно влезе во орбитата на Јупитер и по пет години патување ќе го започне истражувањето на најголемата планета во Сончевиот систем.
Серија на радио сигнали испратени од вселенското летало потврдија дека маневарот за влез во орбитата е изведен како што беше планирано.
За да влезе во поларната орбита на Јупитер, сондата мораше да го запали својот главен мотор да за да закочи, гравитацијата на Јупитер да ја улови и да ја уфрли во поларната орбита.
Основната цел на Џуно е да го разбере потеклото и еволуцијата на Јупитер. Под својата густа покривка од облаци, Јупитер ја чува тајната за основните процеси и услови кои владееле во нашиот сончев систем за време на нејзиното формирање.
– Џуно ќе ни помогне да направиме голем чекор напред кон подобро разбирање на тоа како се формирале џиновските планети и каква улога имале овие гиганти во составувањето на останатиот дел од сончевиот систем, велат научниците од НАСА.
Џуно ќе ги истражува следниве работи:
– Колку вода има во атмосферата на Јупитер, што ќе помогне во одредувањето на тоа која теорија за формирање на планетата е точна (или можеби дали се потребни нови теории)
– Атмосферата на Јупитер за да ги измери составот, температурата, движењата на облаците и други својства
– Ќе ги мапира магнетните полиња и гравитацијата на Јупитер, со што ќе ја открие длабинската структура на планетата
– Ќе ја истражува магнетосферата на Јупитер во близина на половите на планетата, особено северната и јужната поларна светлина (аурора), со што ќе овозможи увид во тоа како огромното магнетно поле на планетата влијае на нејзината атмосфера
Вселенската мисија Џуно започна на 5 август 2011 година. Сателитот треба да орбитира околу Јупитер 20 месеци (37 орбити) и откако ќе ја заврши својата работа треба намерно да се нурне во атмосферата на Јупитер и да согори, што се очекува да се случи во февруари 2018 година.




