Петнаесет минути по полноќ, пратениците во Собранието на Република Македонија со 92 гласа „за“, 3 „против“ и еден „воздржан“ по скратена постапка ги изгласаа измените во Изборниот законик, согласно договорот постигнат меѓу партиите потписнички на Пржино.
– Законот е кус, се состои од три члена. Со оглед на тоа дека преземена е обврска помеѓу четирите политички партии да се запазат рокови, предлагам да го изгласаме денеска, рече Димовски.
Изборниот законик ќе претрпи измени кои се однесуваат на Избирачкиот список, вклучително и можноста Државната изборна комисија да ги брише оние гласачи од списокот што нема да се пријават во предвидениот рок. Според партискиот договор рок за пријавување ќе биде даден на 39.502 лица кои се сметаат за спорни.
Три или повеќе члена на ДИК можат да побараат дополнителна проверка за било кое име. Во таков случај, тие членови можат да побараат личноста да се појави лично ако живее во земјата или преку видеоконференција ако живеат во странство. Овие проверки ќе траат дополнителни 10 дена по 25-дневниот период.
Според независната пратеничка Солза Грчева, вакви решенија се „плукни – залепи“, а партиите се ставаат пред сите институции во државата.
– „Тресла се гора, родио се миш“. Доаѓаат летни одмори, август месец, кој во август, како може практично да направи активна регистрација? Баба Зумбула ќе ја викаат од нива да проверат дали е на список? Па тоа е смешно, тоа е трагично. Како си замислувате дека овие луѓе ќе бидат цело лето на штрек? Јас овие граѓани ги повикувам на Скајп ако се пријавуваат да се маскираат. Па ова е смешно, го нема никаде, кој ќе потврди дека сум ја навистина преку Скајп ве молам. Ваков мајтап нема во цел свет. Бројката е смешна. Ги повикувам овие граѓани, доколку ги нема на Избирачкито список да ги тужат партиите. Бидејќи партиите се ДИК, партиите се државата. Како може МВР да не знае каде живеат граѓаните?, рече Грчева.
И пратеникот од Демократскиот Сојуз Павле Трајанов посочи дека во Избирачкиот список останува простор за манипулации.
-Oвa е е еден театар на апсурдот. Остануваат можностите на манипулации. Овој список не се прочисти 20 години,а нити ќе се прочисти бидејќи нема политичка волја, рече Трајанов.
Измените во изборниот законик беa причина опозицијата повторно да се активира во Собранието.
Координаторот на пратеничката група на СДСМ Горан Сугарески вечерва изјави дека опозицијата ќе учествува во работата на Собранието, бидејќи сериозни обврски произлегуваат од Договорот за фер и регуларни избори што е постигнат, што треба да се реализираат и преку Парламентот.
-Денеска треба да се донесат измените на Изборниот законик. Наша цел е одржување фер и регуларни избори. Сите наши чекори во текот на целиот овој процес на политичката криза што ја предизвика власта се во таа насока, рече Сугарсеки на вечерашната прес-конференција во Собранието.