Во осигурителните компании досега пристигнале повеќе од 350 пријави за штети од невремето од 6 август и поплавите што најмногу го зафатија скопскиот регион, чија вредност е околу 300 илјади евра.
Од нив 320 пријави се однесуваат на оштетен имот, а 30 за автомобили и други моторни возила. Според досега пристигнатите пријави, повеќето се поднесени од граѓани, а 70 пријави се поднесени од компании.
Околу 420 фирми од Сингелиќ се пожалиле дека им се уништени стоки од увоз вредни и до 15 милиони евра, но засега немаат поднесено пријава до осигурителните компании за оштета.
Осигурителните компании очекуваат бројката на пријавени штети да расте во наредниот период.
Во меѓувреме и комисиите за проценка на штетите започнаа со работа на терен на местата кои беа најпогодени од поплавите – Ченто, Синѓелиќ, Стајковци, Економија, Инџиково, Црешево, Брњарци и Смилковци, каде што се поплавени околу 5 000 куќи.
– Комисиите штетата ја проценуваат со директен увид во секое средство и материјално добро во сопственост на правните лица, самостојните вршители на дејности и граѓаните што претрпеле каква и да е штета и за секое прегледано средство треба да утврдат дали е оштетено или уништено, се наведува во Уредбата на Владата за начинот на работа на комисиите за процена и утврдување на висината на штета настаната од природни непогоди и други несреќи.
Членот 5 од Уредбата предвидува дека за потешко оштетените средства треба да се утврди дали нивното оштетување е во толкава мера што не може да се изврши поправка, или трошоците за поправка се толку високи што таа не е исплатлива и во тие случаи треба да се третираат како уништени средства.
По завршувањето на процената, комисиите треба да изработат пресметка на трошоците потребни за секое материјално добро кое треба да биде доведено во првобитната состојба, односно во состојбата пред настанувањето на оштетувањето.
Комисиите го доставуваат збирниот извештај за проценетите штети до Владата, додека извештајот за процена за утврдена загуба на приходот од продажбата на земјоделските растенија и животни и на земјоделски имот и штети на стакленици и пластеници го доставуваат до Министерството за земјоделство, шумарство и водостопанство.