Русија ги осудува сите терористи, без оглед на нивната националност, изјави портпаролот на рускиот претседател Владимир Путин, откако американската полиција уби еден од осомничените за бомбашкиот напад а трага по неговиот брат за кои се тврди дека некогаш живееле во Русија.
Убиениот 26-годишен Тамуран Царнаев и неговиот брат кој е во бегство Џохар, според американските медиуми се етнички Чеченци живееле во немирната кавкаска руска република Дагестан пред повеќе од десет години, а се доселиле во градот Махачкала од поранешната советска република Киргистан.
„Путин веќе неколку пати изјави дека не постојат наши и нечии туѓи терористи…, меѓу нив не може да се прави разлика, со едните да се соработува а другите да се осудуваат. Сите заслужуваат ист пристап, ист вид реакција”, изјави Дмитриј Песков во Сочи, каде што рускиот претседател Владимир Путин имаше средба со египетскиот колега Мохамед Морс.
Песков додал дека руските власти очекуваат официјална информација од САД за убиениот маж и неговиот брат кој е во бегство. Меѓутоа, извори од руската дипломатија за агенцијата РИА Новости изјавиле дека Вашингтон не се обратил за каква и да е соработка со Москва во истрагата. Во меѓувреме американската телевизиска мрежа CBS објави дека Џохар Царнаев добил американско државјанство на 11-ти септември 2012 година/
Американските разузнавачки агенции во меѓувреме продолжуваат со операцијата за апсење на 19-годишниот Џохар Царнаев, осомничен за инволвираност во бомбашките напади за време на меѓународниот маратон во Бостон. Во областа каде што наводниот терорист може да крие, патролираат полициски оклопни возила, полициски автомобили и возила на брзата помош.
Полицијата укажува дека Царнаев, чиј постар брат беше фатално застрелан за време на апсењето во кампусот на Масачусетскиот технолошки институт MIT и почина во болница, може да е вооружен со автоматско оружје и експлозивни направи. Американскиот претседател Барак Обама редовно добива информации за моменталниот статус на операцијата.
Бостонската полиција преку својот профил на Twitter порача дека потрагата по Џохар Царнаев продолжува и сега.
„Трагањето по 19-годишниот Џохар Царнаев продолжува. Осомничениот е вооружен и многу опасен”, се вели во соопштението.
Американската полиција при спроведување на операцијата на апсењето на Џохар Царнаев блокираа една од приградските бостонски населби Ватертаун, каде што според телевизијата CNN во моментов има силна концентрација на полицијата, инженерски единици и агенти на американското федерално истражно биро FBI.
Како што пишува британскиот весник Daily Mail, пред една година, семејството Царнаеви веќе било во интересот на правосудните органи во САД. Така, според весникот, мајката на браќата Царнаеви минатата година е уапсена за наводно крадење облека во износ од 1.600 долари, кога на 13-ти јуни 2012 година била уапсена 45-годишната Зубејдат К. Царнаева , која е регистирана дека живее на иста адреса со осомничените, бидејќи украла облека од бутикот за брендот „Lord & Taylor”.
Исто така, таа била обвинета за намерно оштетување на туѓ имот. Дали предметот стигнал до судот, меѓутоа, не се наведува.