Случајот со Маја Кадиева, родилката која почина за време на царскиот рез заедно со нејзиното бебе добива правна разрешница. На 29 септември на обвинителна клупа треба да се најдат тројца лекари, двајцата гинеколози и анестезиологот кои го вршеле породувањето, (вториот анестезиолог во меѓувреме почина). Сопругот на Маја, Димитар Кадиев се надева дека судот ќе донесе правилна и фер одлука за обвинетите да ја добијат заслужената казна.
„Очекувам судскиот процес да биде брз и ефикасен и судот да ги казни тие што уништија два животи, како и мојот и на мојата седумгодишна ќерка. Се надевам дека обвинетите нема да избегнуваат да доаѓаат на рочиштата, за да може судот што побрзо да си ја заврши својата работа. Се надевам, дека ова ќе биде поука на сите лекари да внимаваат за вакво нешто повеќе да не се случи“, изјави Кадиев за НОВА.
Пред два месеца Советот за оцена на обвинителните акти при Основниот суд во Велес донесе Решение со кое е покренато обвинение за тројцата лекари поради нивно несовесно постапување на 22.10.2015 година, при породување на пациентка во ЈЗУ Општа болница Гевгелија, што резултираше со смрт на родилката и на нејзиното новородено.
Маја Кадиева и нејзиното неродено бебе починаа ноќта меѓу 22 и 23 октомври минатата година, при нестручно изведено породување, а истражните органи докажаа дека анестезиолозите биле пијани за време на царскиот рез. Смртта на Кадиева настанала поради комплетен прекин на доводот на кислород и задушување, поради што се задушило и бебето во утробата на мајката, покажа извештајот од судките вештаци.