На програмата на Скопски филмски фестивал, публикат, вечерва, во 22 часот, ќе може да го види новиот филм на култниот шпански режисер Педро Алмодовар „Многу сум возбуден“. Премиерната проекција е во киното „Милениум“.
Станува збор за комедија, со Пенелопе Круз, Антонио Бандерас и Паз Вега, во главните улоги, во која Алмодовар нѐ навраќа на неговите дела од крајот на 1980-тите и почетокот на 1990-тите години.
Во 18 часот во „Милениум“ е репризата на „Ветена земја“ на Гас ван Сант и „Лов“ на Томас Винтерберг. Во 18 часот во киното „Рамстор“ ќе биде прикажан филмот „Да живеат антиподите“ на Виктор Кошаковски. Во 20 часот ќе биде прикажана репризата на „Хана Арент“ на Маргарет вон Трота.
За 22 часот е закажана проекцијата на британско-српско-црногорскиот филм „Писмо до татко ми“ на Срѓан Кеца, во кој режисерот се обидува да најде смисла во начинот на кој татко му избрал да умре. Фестивалот се отвори во петокот, со филмот „Кругови“, а викендов и режисерот Срдан Голубовиќ гостуваше во Скопје.